Qaxda keçirilən Region Gənclərinin Məşğulluq Forumu gəncləri işəgötürənlərlə bir araya gətirməklə yanaşı, gələcəyin peşələri, dəyişən əmək bazarı və karyera imkanları ətrafında müzakirələr üçün də məkan yaradıb. Forum çərçivəsində 24 işəgötürən tərəfindən 130-dan çox vakansiya təqdim olunub.
Qax rayonunda region gənclərinin əmək bazarına inteqrasiyası və məşğulluq imkanlarının genişləndirilməsi məqsədilə Region Gənclərinin Məşğulluq Forumu keçirilib. Tədbir Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyi və Qax Rayon İcra Hakimiyyətinin təşkilatçılığı ilə baş tutub.
Forumda Qax Rayon İcra Hakimiyyətinin başçısı Elvin Paşayev, Dövlət Məşğulluq Agentliyinin İdarə Heyətinin sədri Hasil Abbasov, Dövlət Agentliyi sədrinin müavini Ceyhun Salmanov, Azərbaycan Dövlət İqtisad Universitetinin Zaqatala filialının direktoru Raqif Qasımov, işəgötürənlər, region gəncləri və digər qonaqlar iştirak ediblər.
Emil Hüseynov forumun panel sessiyasına moderatorluq edib
Forumun əsas müzakirə hissələrindən biri Azərbaycan HR İnstitutunun təsisçisi və direktoru Emil Hüseynovun moderatorluğu ilə keçirilən panel sessiyası olub.
Paneldə gələcəyin peşələri, əmək bazarının yeni tələbləri, gənclərin karyera seçimləri və dəyişən iş dünyasında tələb olunan bacarıqlar ətrafında fikir mübadiləsi aparılıb. Bu baxımdan sessiya gənclərin yalnız mövcud vakansiyalarla tanış olması deyil, əmək bazarında baş verən dəyişiklikləri və gələcək karyera istiqamətlərini daha yaxından anlaması baxımından da diqqət çəkib.
Emil Hüseynovun moderatorluğu ilə keçirilən müzakirə forumun HR və insan kapitalı perspektivini ön plana çıxaran əsas hissələrdən biri olub.
24 işəgötürəndən 130-dan çox vakansiya
Forum çərçivəsində təşkil olunan əmək yarmarkasında 24 işəgötürən 130-dan çox vakansiya təqdim edib. Gənclər müxtəlif sahələr üzrə iş imkanları ilə tanış olmaq, işəgötürənlərlə birbaşa ünsiyyət qurmaq və əmək bazarının real tələbləri barədə məlumat əldə etmək imkanı qazanıblar.
Tədbir məkanında, həmçinin müasir peşələri təqdim edən stendlər qurulub və region gənclərinin uğur hekayələrini əks etdirən sərgi təşkil olunub.
10 gəncə beynəlxalq akkreditasiyalı təlim imkanı
Forumun diqqətçəkən təşəbbüslərindən biri isə seçilmiş 10 gəncin beynəlxalq akkreditasiyalı təlim proqramlarına ödənişsiz əsaslarla cəlb olunması olub.
Bu təşəbbüs gənclərin yalnız iş imkanları ilə tanış olması ilə yanaşı, eyni zamanda öz bilik və bacarıqlarını inkişaf etdirməsinə yönəlib. Beləliklə, forum çərçivəsində məşğulluq məsələsinə həm işə çıxış, həm də bacarıqların inkişafı perspektivindən yanaşılıb.
Gələcəyin əmək bazarı hansı bacarıqları tələb edir?
Bu barədə “Gələcəyin iş yerləri və müasir peşələr: Dövlət dəstəyi mexanizmləri” mövzusunda paneldə geniş müzakirələr aparılıb. Müzakirələr zamanı gənclərin əmək bazarına keçidi, bacarıq əsaslı kadr hazırlığı, işəgötürənlərin dəyişən gözləntiləri və regionlarda insan kapitalının inkişafı kimi məsələlər diqqət mərkəzində olub.
Qaxda keçirilən tədbir bir tərəfdən region gənclərini real iş imkanları ilə əlaqələndirərkən, digər tərəfdən onları əmək bazarının gələcək istiqamətləri barədə məlumatlandırıb.
Forumun əsas mesajlarından biri gənclərin əmək bazarına hazırlığının yalnız məşğulluq imkanlarına çıxışla məhdudlaşmadığını, uğurlu karyera üçün düzgün istiqamətləndirmə, əmək bazarının tələblərinə uyğun bacarıqların formalaşdırılması və davamlı peşəkar inkişafın mühüm rol oynadığını göstərdi.
HRnews.az
18 sentyabr 2026
